اصرف ع النيل

كتب_محمد حسام الدين

للاسف النيل عندنا بقى عامل زى "السلطة"

محطوط عليه شوية "صرف صحى" على شويه "جثث" على شوية "قمامة"

وعليه شويه "بلهاريسيا" علشان تملح طعمه وشويه كائنات حيه تعيش وتتعايش تنزل تستحمى علشان تقلب المكونات

.

.

.

.

.

 

*( diving ب 1.50 خدلك)

تخيل لو بقى فيه فى النيل diving هنشوف ايه تحت !!

سالت نفسك السؤال ده قبل كده ؟؟

هنشوف اكياس الزبالة ولا هنشوف ال.... (الصرف الصحى)

ده احنا ناقص ننزل نلاقى السمك بياكل فول وطعمية تحت ،،

لو جه سياح عايزين يغوصوا هيبقى شكلنا حمادة بالجنزبيل

.

.

.

.

.

.

* كيس فى جيبك

أيه ياخويا ما بدل ما تفضل تلغ على النيل وترمى تلغ وترمى ما تاخد معاك كيس ولو تقيل اوى بالنسبالك حطه فى جيبك

وانتى يا حاجه حطيه فى شنطتك ،

وكل واحد ياكل براحته ،

يخلص يحط فى الكيس ولما يروح يرميها وكده اتفضينا،

وكما قال الاستاذ رمضان مبروك ابو العالمين حموده مدرس اول اللغه العربيه

"ياختى حلوة"

وهذا ينطبع على اللى الكيس بيبقى تقيل عليهم

.

.

.

.

.

.

.

.

*ما تعملهاش فى النيل

مهما كنت مزنوق اوعى تعمل فى النيل ،،

النيل ملك عام مش ملكك لواحدك ،،

هو انت ما بتقرفش لما بتفتكر ان اللى انت عامل فيه ده بترجع تشرب منه ،

لو مزنوق اوى وهتعمل على نفسك دور على اقرب مسجد او مطعم كبير ،

بدل ما ترجعوا تشتكوا من تلوث الميه وانتوا السبب فيه

مهو لما كل واحد يعملها فى النيل يبقى الميه هتتنيل اكتر ما هى ،

ده ممكن ما عدتش يبقى فيه سمك اصلا من الريحة ،

.

.

.

.

.

.

*ابنى حضاره

ابنى حضارة بلدك التانيه ابنيها مش علشان شهرتك ابنيها علشان بتحبها

ابنيها علشان عندك امل ابنيها وما تيأسش

شوف جدك المصرى القديم يمكن تطلع بفايده

اتعلم الصبر اتعلم الطموح اتعلم العزيمه ، واتعلم الامل فى بكره

ابنى حضاره بلدك التانيه علشان ولادك وولاد ولادك

ابنيها علشان يستفيدوا منها

ابنيها علشان يعتبروك زى اجدادنا دلوقتى

ابنيها وحافظ عليها

ابــــنـــــيـــــــهـــــا

أضف إلى: del.icio.us | Digg